Barcelona, Hispania
Staa wa Arsenal, Hector Bellerin anakumbuka vizuri utamaduni wa kutunza mazingira aliojifunza kwa babu yake tangu akiwa mtoto mdogo katika viunga vya jiji la Barcelona.
Katika kuuendeleza utamaduni huo, Bellerin ambaye kwa sasa anacheza kwa mkopo katika klabu ya Real Betis ya Hispania, anaendesha kampeni ya upandaji miti lengo likiwa ni kupendezesha na kusaidia utunzaji na uhifadhi wa mazingira duniani.
“Nikiwa mdogo niliishi na babu yangu Barcelona, nilikuwa nakwenda naye kwenye bustani yake na huko tulipanda miti na kucheza kwenye pori dogo, kwa hiyo hili ni jambo linalougusa moyo wangu,” alisema Bellerin katika moja ya mahojiano aliyowahi kufanya.
Wakati Ligi Kuu England msimu wa 2019/20 ikiwa imesimama Machi mwaka jana kutokana na janga la Corona, mbali na juhudi za kujiweka fiti, Bellerin pia alitumia muda huo kuendeleza harakati zake za upandaji miti na utunzaji mazingira jambo ambalo analifanya kutokana na mapenzi aliyonayo katika jambo hilo.
Katika kuifanyia kazi kampeni hiyo, Bellerin aliahidi kupanda miti 3,000 kwa kila mechi ambayo klabu yake ya Arsenal ingeibuka na ushindi katika mechi zilizobaki za msimu huo.
Bellerin pia amekuwa akiwahimiza wachezaji wenzake kusaidia katika kampeni za utunzaji mazingira na upandaji miti, “Ni jambo zuri kujivunia kwa kile tulichonacho, iwe ni magari yetu, saa za bei mbaya lakini pia ni muhimu kuwasilisha ujumbe wenye maana, angalia katika hilo tuko kimya,” alisema Bellerin katika moja ya mahojiano.
Septemba mwaka jana, Bellerín alitangazwa kuwa mwanahisa wa pili kuwa na hisa nyingi katika klabu ya Forest Green Rovers ya England inayoshiriki ligi ya EFL (League II) , aliipongeza klabu hiyo kwa kampeni yake ya kuhimiza ulaji mboga na matunda (veganism) na kampeni za utunzaji mazingira.
Bellerin ambaye mwaka 2017, alianza kuwa mlaji wa mboga na matunda (vegan) jambo ambalo anasema limemsaidia kuimarisha afya yake, moja ya mikakati yake kwa sasa ni kushiriki kupanda miti katika msitu maarufu wa Amazon (Mapafu ya Dunia) ambao kwa sehemu kubwa upo nchini Brazil. Katika hilo, Bellerin anashirikiana na taasisi ya One Tree Planted.
